XOG:Siciid Denni & Saaxiibadiisa siyaasada oo kulan deg deg ah ka yeeshay cida noqonaysa Afhayeenka Baarlamaanka Puntland

GAROOWE(P-TIMES) – Warsidaha PuntlandTimes wuxuu ogaaday in uu dhacay kulan saacado dheer qaatay oo si gaar ah ay u yeesheen Madaxweynaha Puntland Siciid Denni iyo saaxiibadiisa siyaasadeed, kaas oo ay kaga wada hadleen sidii loo dooran lahaa gudoomiye Baarlamaan oo taageersan gollaha xukuumadda.

Kulankaas ayaa qaatay waqti dheeraad ah waxayna dhinacyadu kaga wada hadleen sida ay suuragal u tahay sidii looga fogaan lahaa in ay saameyn ku yeeshaan doorashada hoggaanka Baarlamaanka cid aan taabacsaneyn Xukuumadda.

Madaxweynaha Puntland iyo saaxiibadiisa xagga siyaasada ayaa miiska wada xaajoodyada soo dhigay labo musharax oo la xaqiijiyey in ay yihiin kuwa u tartamaya qabashada xilkan iyo musharax kale oo isna saameyn badan yeelan doona, haddii uu ku dhawaaqo musharaxnimadiisa.

Warar ay heshay PuntlandTimes ayaa sheegaya in Madaxtooyada Puntland ay doonayso in uu noqdo Afhayeenka Baarlamaanka afarta sanno ee nagu soo aadan Cabdirashiid Yuusuf Jibriil oo horey uga soo shaqeeyey Madaxtooyada, kana mid ah xubno dhaliilo badan loo jeediyo oo ku jira gollaha, qeybna ka qaatay sidii xilka looga qaadi lahaa gudoomiyaha diiday natiijadii Baarlamaanka.

Madaxtooyada ka sokow damaceeda qaar kamid ah saaxiibada Siciid Denni ayaa u arka in uu Abwaan yahay nin aan ka gadmi karin dadka iyo Baarlamaanka gudihiisa oo ay tahay mid halis badan keenidiisa, gaar ahaana ay sii kordhinayso sumcad-xumida kasoo gaartay faragalintii Baarlamaanka ee Madaxtooyada.

Xogta aan helnay ayaa sheegaysa in miiska wada xaajoodyada ay dhinacyadu keeneen Cali Dhahar oo isna katirsan xildhibaanada Baarlamaanka waa qunyar socod laakiin muddo dheer khibrad u leh howlaha Baarlamaanka, wuxuuna 8 sanno oo hore soo ahaa Xoghayaha joogtada ah ee golaha inkastoo Baarlamaanka ayuu soo galay bilowgii sannadkan markiisii koowaad.

Mr. Dhahar caqabado waa weyn ayaa hortaagan dad badan ayaana ku dhaliilaya in uusan lahayn saamayn weyn oo ku wajahan arrimaha gobalka Sanaag, taas oo ay doonayso xukuumadda Puntland cid ka xigsata soona jiidata bulshadaas oo hada u arka xukuumadda mid aan iyaga waxba muhiimad ah u haynin.

Siciid Denni ayaa kalsooni weyn ku qaba Cali Dhahar sida ay ogaatay PuntlandTimes, waxaana xoguhu sheegayaan in uu dhex maray kulan gaar ah.

Warar madax banaan oo aan helnay ayaa sheegaysa in aysan wali jirin go’aan rasmi ah oo ay qaateen Madaxweynaha Puntland iyo saaxiibadiisa siyaasadeed oo iskugu jira ganacsato, siyaasiin iyo wasiiro ka tirsan xukuumaddiisa, waxaana adag in ay hore iskugu raacaan arintani balse kulan dambe ayey yeelan doonaan ka hor maalinta Khamiista oo ay doorashadu dhici doonto.

Warbixin gaar ah ayaan kaga hadli doona sadexdan musharax waxa laga yaqaano, saameyntooda ku wajahan gobalka Sanaag oo ay kasoo jeedaan & Damacyada jira.

LA SOCO WARARKEENA RIIX HALKAAN

Be the first to comment

Leave a Reply

Your email address will not be published.


*