Askari Kenyan ah oo nus Dollar baad ah ku dilay darawal

NAIROBI(P-TIMES)- Dad caraysan ayaa mudaharaad rabshado wata ka hor-dhigay Isbitaal ku yaala Nairobi kadib markii Askari ka tirsan Booliska Kenya uu toogtay nin ka mid ah raga mootada kaga shaqeysta magaaladaasi, markii uu askariga u diiday inuu siiyo lacag u dhiganta nus doolar.

Daniel Mburu Wangari ayaa la sheegay in mootadiisa uu kusoo qaaday ilma yar oo ku haftay biyaha webi mara duleedka Nairobi iyo hooyadii dhashay canuga, waxaana keenay isbitaal, si loola tacaallo xaaladda canugaas.

Ninkii mootada waday ayaa markii uu yimid isbitaalka Mama Lucy waxaa uu qeybta degdeg geeyay canugii yaraa ee uu soo qaaday, waxaana loo oggolaaday inuu gudaha u galo, balse waxaa loo diiday inuu mootada gudaha la galo.

Ciidan boolis ah oo ku sugnaa albaabka isbitaalka ayaa ninkii mootada waday waxay ka dalbadeen lacag dhan nus dollar, si mootadiisa loogu oggolaado inay gudaha gasho balse ninkan ayaa sheegay inuusan awoodin oo uu la baxayo mootadiisa, waxaana goobtaas ka dhacay muran sababay in askariga uu toogto ninkan oo markiiba goobta ku dhintay Sida ay dad goobjoogayaal u shegeen wargeyska Daily Nation ee kasoo baxa Kenya.

Booliska Kenya ayaa sheegay iney baaritaan wadaan askariga dilka geystayna sharciga la marin doono, waxaana falkan aad uga carooday shacabka magaalada Nairobi oo si weyn iskugu dhaafsaday sheekadan baraha bulshada.

“Waxay ka dalbadeen lacag 50 shilling Kenya AH (nus dollar ah), balse waxaa uu ku yiri ma hayo lacagtaas. Dadkii kale ayaa ku yiri bannaanka iska dhigo mootadaada, markiiba waxa uu damcay in uu bannaanka dhigto mootada, waxaana booliska uu ka dalbaday inay u oggolaadaan inuu mootada dhigto bannaanka isbitaalka,” ayuu yiri qof goobjooge ah oo la hadlay Daily Nation.

Be the first to comment

Leave a Reply

Your email address will not be published.


*